DCHome.net 數碼天地論壇

 找回密碼
 註冊
搜索
查看: 173953|回復: 178

其實鳥攝打飛的難度係乜?? (4月2 更新及完結, 1樓-加入設定篇,技術,器材篇)

  [複製鏈接]
發表於 2013-3-28 00:23:46 | 顯示全部樓層 |閱讀模式
本帖最後由 rol 於 2013-4-5 08:26 PM 編輯

首先想說明, 以下所出爛相只係幫助說明動態鳥攝所面對的困難.. 與器材及技術關係..  小弟手慢不擅長打飛, 生態區大把師兄影好過我..

Part 1.  難度篇

1. 先出最易影飛的..  南生圍水鳥..  快門無一張係過千, 最慢1/320 sec.. 為何在動態鳥攝中這類相算易影?  因為 :

- 大量水鴨供作打飛目標, 依隻影唔到轉影另一隻.  一個朝早可不停番拍又番拍過千張都仲可以
- 隻水鳥由南生河頭飛到河尾, 飛足成里遠比你pan鏡, AFC 甩左焦都仲可以追番
- 隻水鳥的飛行途徑係有規律橫飛, 與相機距離沒有太大改變, 沒有考驗到AFC 追焦能力..
- 南生圍背境空曠,  水鳥與背境有一段距離不黐底, 沒有考驗AFC 辨認目標能力.  

1. D300 AFS684II  1/640  


2. D300 1/800


3. D300 1/320


4. D300 1/320


5. D300 1/320


6. D300 1/320


2.  跟著出第二類, 當影得南生圍水鳥多, 通常鳥攝愛好者開始轉影翠鳥..  這類會比南生圍水鳥困難得多 :

- 翠鳥飛行速度高很多, 又細隻很多
- 飛行路徑比水鳥短很多
- 飛行唔一定橫飛, 不規則, 可橫可突變直飛, 以下面白胸翠係直線飛近相機.
- 最大難度, 係翠鳥出現率低很多, 藍翠與班魚狗不常出現, 有時等足一日都無, 無法大量番拍.. 當然有心人仕會知道小翠與白胸出現地點, 有恆心可以日日去影都可以提高成功率

7. D300 1/2500


8. D300 1/1600


9. D300 1/2000


10. D700 1/1250


11.


12. D300 1/1600



3.  跟著出第三類.. 當真正鳥攝者影得翠鳥飛多, 就自然想影下爆水.. 精彩埸面..

- 基本上每乜人能夠由翠鳥起跳, 向下飛, 入水, 出水. 影足整個過程, 通常都係放棄起跳部份, 只可以影由水中, 爆水, 出水部份 ..
- 難度與第二類差不多, 只不過出現爆水機會率更低,  一擊不中, 惟有食白果

13. D300 1/1600


14.


15.


16. D700 1/2000


17.


4.. 第4 難度相.. 當鳥攝影得咁上下年資, 已經不會只滿足於水鴨, 翠鳥,  所以轉而去影少有雀如林鳥, 猛禽, 過境性鶲, 鶇, 之類.  這類雀攝的困難與樂趣亦在於尋找.. 就算正常找到這類雀, 就算想影企定定都不客易, 更可況要想影飛..  困難在於 :

- 體力, 要托住 585/684 機腳頭近10 KG 器材行上大浦滘藍路, 城門水塘六號埸, 少D 體力都唔得..
- 尋找雀鳥的技術.  沒有觀鳥經驗/訓練, 有好野在面前亦睇唔到.
- 雀運.. 這個無話可說
- 林雀棲息於樹叢陰暗間, 根本不足夠光線影飛, 更很容易有樹技入鏡

以上討論的雀攝難度是排除左人工擺佈引雀, 如果用引雀方法拍攝, 就可以不斷番拍又番拍提高成功率.. 難度就大副下降

18. D3S ISO4000,  1/1600


19.


20.


21. D3S ISO1250, 1/2000


22. D7000 ISO1600  1/1000


23. D3100 ISO800 1/2500


寫左咁多, 只係想講為何鳥攝愛好者會花咁多錢追貴器材.. 其實與有幾多快門關係不大..

當然有人用手機, DC 仔, V1..  等平器材可以一擊即中影到第3 類爆水相, 第4類林鳥飛, 小弟亦拜服得五體投地..

Part 2 設定篇
先講講, 可以機身, 鏡身可供調較的設定 :

2.1.  單點追焦, 動態追焦, 3D 動態追焦
單點追焦 : 理論上,  單點對焦最快.  如果Pan 鏡技術可以永遠 lock 實單對焦點在飛行中雀鳥上, 就使用單點最好,  無須要使用動態追焦.  當使用單點追焦時而對焦甩開雀鳥身上, 就有機會甩焦.   可想而知, 單點用在飛行有規律可預測性的水鳥, 鷹, 大型雀鳥上較適用.  

在使用單點對焦上有一點要注意, 由於單對焦點面積行細, 如果單焦剛好落在沒有明顯detail 的地方如雀鳥腹部, 對焦系統會以為無法合焦而不釋放快門

動態追焦 : 當雀鳥短暫時間甩出對焦點, 會使用其他對焦點繼續對焦, 可選上9-21-51 點 而決定範圍.  代價是會拖慢對焦.  如果雀鳥與背境唔容易黐底, 動態追焦可有效應付不規則飛行而細小的鳥類.  如果雀鳥與背境容易黐底, 對焦就有機會甩左落背境到..

3D 動態追焦 : 可靠度不高, 不建議使用..  如雀鳥背境係天空完全唔會黐底, 可以一試.

簡單講, 只有有單點追焦, 動態追焦可用..  NIKON 自D7000 開始, 改變了"動態追焦"在迷焦時修正對焦的特性..  "動態追焦"在迷焦時, 會傾向在現處的對焦距離前後附近猶豫多幾下尋找對焦目標.   相比使用"單點追焦"時迷焦, "單點追焦"會傾向走回最近/最遠重新對焦..

2.2  9-21-51 點動態追焦
9 點最快,  51 點最慢..  再與機體級別有關,  同係用51 點, 旗艦機運算會快點..  

2.3.  AFC 對焦 / 快門 / 快門+對焦 / 對焦+快門 優先
正常影飛鳥, 不會揀快門優先.  但如果揀對焦優先 + 單點對焦,  就有機會如上所講  : 當單焦剛好落在雀鳥沒有明顯detail 的地方, 會不能釋放快門

如果用對焦優先+多點動態追焦, 只要其中一點找到detail, 快門都會釋放.

只有D4 才有"對焦+快門優先, 在對好第一張焦後, 會轉為快門優先, 不過對影飛雀不見有幫助, 因為當D4 迷焦行完一次最近最遠仍未能合焦, 就會不合焦都釋放快門..

2.4.  AFC Lock on
這個設定關乎AFC 對焦點甩開目標雀時, 會等待多少時間AFC 重新再對焦..  亦都關乎雀鳥由靜止到起跳時, 相機AFC 起動的反應時間. 特別係雀鳥由正面直接飛近相機, AFC Lock on 須要更快更短的時間去啟動對焦..  Canon 有同一function 但叫做AF  sensitivity, 更貼切表達這功能的意義

南生圍打飛鴨,  目標明確, 大大隻又唔易黐底, set 長有著數..  

反過來影翠鳥, 細隻之餘, 又須要AFC 快速修正對焦, set 短有著數

要注意 set 得太短, 當影番企定定雀時, AFC 修正可能會太敏感不停輕微走前走後, 而影響對焦準確性

2.5.  鏡身對焦距離區域
以384 為例, 明知唔會影飛雀近得過3 米, 就set 去3米至無限遠, 減少無用對焦行程

2.6.  鏡身 VR
影得飛雀快門都唔會慢. 建議熄左個VR, VR 組件運作時會懸空浮下浮下拖慢對焦.   寧願熄左個VR比多D 電去推支鏡追焦..


Part 3.  技術篇
要用好追焦, 唔係只係長按半快門AFC 唔放手PAN 雀就得...

3.1 先了解雀鳥習性, 動靜, 飛行模式
鳥攝亦屬於觀鳥一部份, 搵唔到雀根本就無得影.  熟知鳥類習性, 可預知鳥類下一步動作與飛行方向..  例如觀察得雀鳥多, 就會知雀鳥煩躁不安會係起飛先兆, 又可能係鳥類找到獵物而調整左姿態, 有時可能係佢屙完屎, 梳完羽毛.  至於起飛方向, 新手最易犯的毛病就係同隻雀企得太近, 雀鳥起飛時9成會飛去人群的反方向逃走.. 變左只係影到個pat pat..

3.2 瞄準雀鳥入Viewfinder 所須要的set up 時間
同開槍一樣, 以tele 鏡須要在viewfinder 中找到飛行中的雀鳥不是易事.  搵得太耐都未搵到隻雀都飛走左.. 這個別無他法.. 只有苦練.  現在市面上有外罝準星可裝上相機/鏡頭上, 方便更快瞄準, 但有利有幣.. 這個在第4 篇 - 器材篇再講.  如果隻雀肯等你飛慢D而你手上又係支zoom 鏡, 可以先推去wide 瞄中後才推回tele..  

3.3 PAN 鏡技術
當瞄中雀後, 還要PAN 鏡維持與雀飛行同步.. 基本上雀鳥橫飛, 又或正面飛近, 飛得慢係最容易pan.. 不規刖或又上至下最難pan.  最好當然係雀鳥有很長的飛行路程比你由遠PAN 到近.  像南生圍, 米埔有空曠地方.  如果沒有.  雀鳥又飛得很快.. 除左苦練, 還有兩個方法提高pan 鏡成功率..

- 企後D啦.. 師兄, 拉遠與雀鳥距離, 或用支wide 一點的鏡 (但影出來隻雀會細左, 影響可觀性)
- 將鏡頭由三腳上拆下來, 轉為手持, 手持PAN 鏡的靈活性比沙雀8, 鞦韆架還要高.  第一篇的#10, 11, 16, 17 都係手持684+14E 影的 (但手持2kg 以上鏡就不能持久)

3.4 了解對焦
先要了解對焦系統的2大特性, 才能講對焦的技巧 :

- 對焦系統會選擇容易辨認的目標進行對焦, 容易的目標係: 1) 多細節,  2) 光線充足, 3)大對比..   即係對焦系統隨時會選擇背境後面棵樹對焦, 而非隻雀..
- 如果兩個目標容易辨認程度一樣,  對焦系統會跟據現在鏡頭對焦行程身處的距離, 選擇最接近自己的目標進行對焦.. 如下圖

以下面圖所示, 對焦系統很大機會會以樹林進行對焦 :

Diagram 1 :
無限遠<----樹林(20米)-------現在鏡頭對焦行程(19米)---------飛行中雀鳥(10米)---------------------------相機(0米)


要避免以上情況, 有兩個方法 :

3.4.1  Pre-set - 先估計而設定對焦行程在最接近雀鳥飛行的距離, 然後侯機等待目標出現, 這樣會變成:

Diagram 2 :
無限遠<----樹林(20米)-----------------------------------------飛行中雀鳥(10米)---現在鏡頭對焦行程(8米)--相機(0米)

3.4.2  陷阱對焦
不建議使用.. 中陷阱可能得一張, 影響連拍性能.

3.5  手動對焦環, AFC,  memory recall 的混合應用
如果在連拍中才遇到 diagram 1 的情況, 但AFC 仍然黐死在20米樹林處, 不肯跑回10米雀鳥處.  可以 :

- 鬆開半按快門手指後, 再半按快門啟動AFC, 但很可能重新對焦後仍然黐死在20米樹林處
- 即時手動MF, 手擰去10米 處, 才再半按快門啟動AFC
- Memory recall 事先set 左去10 米, 一甩焦就按 Memory recall 回復到10 米處..

3.6 器材操作熟練性, 預視照片結果的能力
幾好的器材, 唔熟練使用都係大打折扣.. 新手最常問須要幾高快門才能打到飛雀, 這問題沒有絕對性.. 就算係去影最容易影的麻鷹, 不管飛得幾慢, 如果飛得太近超過左鏡頭焦距的最佳距離, 對焦與PAN 鏡困難大增..   所須"快門公式"是:  

鏡頭焦距 + 飛行雀鳥速度 + 雀鳥與相機距離 = 所須要快門速度凝定雀鳥動作.

eg :  600mm + 普通翠 + 距離相機15米 = 1/1600 sec   

飛鳥愈接近鏡頭, 就愈須要更高快門.
飛鳥速度愈高, 愈須要更高快門.
鏡頭焦距愈長,  愈須要更高快門.

如果距離縮近至10米,  可能就要提高快門到1/3000 sec, 愈接近相機就須要愈高的快門..  如果不提升速度係唔係唔得 ?  唔係, 只不過成功率會降低很多. 一係就企番後一點拉遠番與雀鳥距離,  一係就換支wide 一點的鏡頭..   只不過每位雀攝人希望影到大大隻近距離的靓雀.. 有時雀鳥會飛至多近亦不能預料,  所以寧願用高一點的快門速度.  

快門公式沒有絕對性, 如果有人用正途(非引雀) 博到一張用1/100 sec 影翠鳥飛, 我並不稀奇.. 除左讚佢技術高超, 我只會懷疑佢成功率有幾高. 有經驗的鳥攝者正常情況不會以超常規去影, 除非係影風流雀 : 影隻雀影左幾十GB 爆咭, 博一張F22, ISO100 玩野之作.. 一係就情況惡劣到無選擇

順帶一提, 人們通常有錯覺是飛鳥快不過跑車/戰機/火箭..  所以影跑車/戰機/火箭更難更須要高速快門.. 這講法理論上是對,.  如果飛行戰機與相機距離真係跟普通翠一樣係15 米.  但事實上是全錯, 因為戰機不會飛到咁近拍攝者.  就算係拍攝者唔怕死, 冒死走迎至15米內影, 亦不可能係用600mm, 用支70-200 都未影得晒隻15米內的戰機.. 以難度而言, 戰機/跑車體積比雀鳥大幾十倍, 沒有考驗AFC 辨識目標能力.. 而戰機/跑車的行走模式有跡可尋.  雀鳥飛行則較難預測


Part 4.  器材篇
可能係最爭議一部份..

4.1 相機

4.1.1 相機可用ISO
想講下可用ISO 的故事與變遷. 大約8年前Nikon 仲係D70, D200, D2X 的時代.  可用ISO 不高過400,  DSLR 並未普及化, 莫講話鳥攝, 更家唔洗講雀攝級大炮級鏡頭.  當年大部份的鳥攝都係去西貢影下麻鷹, 去南生圍米埔影下白鷺, 就已經係好神下..  如果可以影到清楚少少的翠鳥就已經好威水. 所以當年有云只要影到小翠擺上生態區就例必加爆分.  當年一大班雀攝人在西貢圍影麻鷹, 白腹海鵰,  Nikon 相機ISO 不及同期 20D, 350D,  到下午5 點幾開始唔夠光, Nikon 使用者會開始收鏡離場, 但Canon 用家還可以繼續影. 所以當年可用ISO 得400, 大部份難度高的如爆水, 林鳥飛根本上係極難拍攝

等到2007後推出 D300, D3 可用ISO 一下推上ISO800 以上, 以前極難影到的題材一下子變得客易多了,  更高可用ISO 提升了快門速度亦提高了拍攝成功率..以前D200須要用328 F2.8 光圈才達到的快門速度,  用D300 只須要384 F4 光圈就做到,  變相對鳥攝的入門門檻降低了.  所以參予鳥攝的人數, 及被拍攝雀鳥品種大副上升..  

時至今日, 入門機都有ISO12800, 基本上全民皆可影雀的時代來臨了..

講左咁多廢話.. 只係想講幾點 :

- 請盡量積極地去使用高ISO 去提高快門速度, 而提高成功率  
- 先求影到, 才去求影得好..
- 以低ISO100, F22, 快門1/50 影飛雀的, 請留比大師級去做.. 人貴自知
- 唔好同人比, 要同人比點解同係用ISO3200, 人地會滑得嚟又多細節過你, 咁就無得慳荷包
- 衡量一下自己有幾多時間去影雀, 有無得好似人地唔洗做, 不用考慮成功率, 日日去不停番影小翠, 班魚狗爆水到成功為止\r

  
4.1.2  相機的AFC 連續對焦能力
先要講快門時滯..這方面的數據Nikon 沒有每一部機都公報,  一般高中階機的快門時滯約為45ms,  次一級60ms, 入門機要約100ms

D4, D3 大約 40ms 以下
D300 大約 45ms
D7000 大約 60ms
入門機 D3200, 5200 : 不詳

可能唔少人都聽過, 快門時滯即係影響由按快門到實際拍攝所攝時間, 但影響連拍更大的是反光板遮黑時間, 當反光板升起遮黑時, 除了你所見到viewfinder 突然一黑外, 在反光板未回復原來位置時, 對焦系統會短暫失效. 出現短暫AFC 失效斷層. 所以 :

- 反光板遮黑時間愈長, AFC 連續對焦時間變得愈少, 每張連拍之間出現甩焦的機會愈高.

以圖示 1 秒3 張連拍的情況:

按快門 (0秒)--->快門時滯+反光板遮黑 +成像 --> AFC -->快門時滯+反光板遮黑 +成像-->AFC  -->快門時滯+反光板遮黑+成像--> 完成 (1秒)

這方面廠方所公報的資料更少. 只係當年公報D200 時提及約100ms..  雖然廠方沒有公報反光板遮黑時間, 但心水清用家會感覺得到"快門時滯" + "反光板遮黑"  在入門機, 中階, 高階機的分別.. 簡單講旗艦機的快門聲係快到只聽出一下聲包含左快門組件與反光板的運作聲, 而同係按一次快門,  中低機身係會聽出兩下運作聲.

亦因為高階機的"快門時滯" +"反光板遮黑" 時間比低階機短, 所以有更好的拍連時AFC 能力, 即使將高階機的連拍速度減低, 情況亦不變.

很多人會有懷疑, 高階與低階機這幾10ms 的差別係咪真係咁大啊?  這個很難說, 因為雀鳥由相機 viewfinder 內飛出框框的時候, 亦只有幾10ms, 影唔影到亦可能係一瞬間決定..

4.1.3 相機的操控性
D7100 /7000 以下的機種不設 AFC Lock on 設定選擇,  而 AFC 對焦 / 快門優先的設定亦局限部份選擇, 至於高階與入門機的機身操控性分別, 有大量討論, 不用多提

至於使用DC, V1, V2 無反之類, 對焦系統與單反有分別, 只是用contrast detect AF 而不是單反的 phase detect AF, 現在有部份無反是混合式AF, 但AFC 功能與效率始終不及單反, DC V1 由於景深大, 可以是優點, 因為中焦範圍大. 亦可以是缺點, 雀鳥與背景一樣sharp, 無法突出雀鳥為主體.. 一支真正full frame 用的500mm 鏡頭是有很長的對焦行程而能夠更準確細緻定出每一個距離, 從而造出淺景深立體感,  但一支用在crop 機DC 上的"等效" 500mm 鏡頭, 對焦行程隨時短過支14-24..

另外以EVF 取景的DC 無反, EVF 的實時顯示與現實始終會有time lag, 亦增加了使用在動態飛行上的難度  


4.1.4 相機的連拍能力
高連拍力的好處..:

- 最直接, 提高成功率, 多幾張相揀 :  有時撞啱sharp 嗰張相隻雀又擰轉左頭唔睇鏡, 唔sharp 嗰張又姿態一流
- 高連拍速度, 可以快過雀鳥拍翼的節奏, 耍不然, 可能連拍每一張出來都拍翼都係向上 / 向下..
- 有高連拍能力的相機, 反光板的遮黑時間較短, 有更多時間追焦

示範在 #32 樓, 用D3S 一秒9 連拍34 張蛇鵰, 由於拍連速度快, 可影出拍翼的不同動作

4.1.5 相機的全天侯耐用能力
大家會理解到影生態的都會日晒雨淋, 其實一般相機的耐用程度比相機更新週期長的多, 用到有新機出一般部舊機都未壞


4.2 鏡頭
常說買你財力, 體力可負擔的最長定焦.. 以影飛則不一定, 如果去米埔影猛禽, 856 都隨時唔夠長.  但正常打飛的鏡頭焦距愈長就愈難瞄中飛行中雀鳥. 另外太長太重的鏡頭必須配合腳架使用.  不能長時間手持.  

另外如果環境不穩定, 如坐舢舨, 細船出海影海鳥, 燕鷗..  4/5/684 大炮亦無用武之地, 有人試過出意外連5/684 都掉埋落海..

如果考慮到要手持追飛雀如燕子, 燕鷗, 翠鳥一類, 最好鏡頭得重量不超2kg,  超過2kg 以上再上相機重量, 手持會變得吃力.  多得相機ISO 的提升, 間接令光圈不大的鏡頭如384, S50-500OS 的可用性大增. 如果單以打飛手持靈活性考慮, 我寧願使用384 而放棄更重的328,  328 大約2.9kg 理論上是可以手持, 不過如果長時間維持舉鏡瞄準+侯機姿勢就不太可能, 還須要考慮揮鏡pan 追雀時更加費力累死人, 還是放回三腳上使用.

如果係4,5,600 大砲, 基本上就必須要三腳輔助pan 雀.

4.3 三腳, 頭, 準星
當使用到2kg 以上鏡頭時, 就須要配合三腳架使用, 起碼在等雀候機時可以放鏡頭在腳架上節省體力.  三腳不用多提, 影飛雀與影其他題材沒有特別分別.  反而影飛雀對頭就有特別要求, 最平見是鞦韆架正是專為影飛雀pan 鏡而設計, 可調節鬆緊的油壓頭亦可用來pan 雀,  反而波頭就不太方便..

選用與使用正確的鞦韆架, 應該係鞦韆架剛好承托著鏡頭+相機的重心一點, 無論鏡頭斜向上或斜向下, 都可以在不用lock 死狀態下已經可自持而不會自動跌下.

單棍也可以使用作pan 雀, 不過不太建議, 因為一隻手必須要扶著單棍, 另一隻手按快門, 已經沒法騰出多一隻手去擰對焦環及其他設定.  另外單棍只方便於橫向pan 鏡. 由上向下的tilt 就不太方便, 又要騰出多一隻手去擰tilt 的鬆緊制才可調節.

準星的使用, 主要是減少瞄準飛雀的時間, 以及追蹤飛行的準確度.  太大型的雀鳥根本上不用準星, 只用viewfinder 已經可以.  但如果要追難度第二, 三類翠鳥爆水, 以viewfinder 追蹤飛行的成功率不高.  所以早年自城門谷開始有小翠爆水, 就有人使用準星.  使用準星時全程眼只望準星而放棄viewfinder. 好處當然是能提高追蹤飛行的成功率, 但缺點是由於放棄 viewfinder,  有否對中焦 ? 實際拍攝情況? 不得而知.. 有點像靠撞彩機關槍式掃射

結語 :

先多謝各位師兄的回覆, 鼓勵, 加分與支持

很想引用Tylaw 師兄在#75 的一番說話:

" 師兄所講經驗,其實我都明白及經歷過,多謝師兄詳細講述,若有新仔求教,我就可以借用師兄文章,好等我省些氣了!謝謝! "

其實如果真正及有經驗鳥攝人, 不用看我以上所寫, 本身已經心領神會.. 小弟本篇所出的相片大部份己經係3年前所拍下的舊相..這亦是我所走過的道路. 鳥攝人會根據自己的心路經歷發展, 而發展出不同喜好與道路. 有人喜歡到米埔守候猛禽, 有人喜歡影各種飛行動作, 有人喜歡去搵稀有品種, 有人喜歡遠征海外..  很自然會知道自己所須器材.

以真正鳥攝人所投入的心力, 時間, 精神相比,  花費金錢在器材上反變得微不足道, 一支5/684 + D4 / D800E 只不過係入場卷,  予其花時間在器材比較上, 不如買自己能力能可負擔的最好器材, 轉為將時間用在享受鳥攝的樂趣仲好.  反過來負擔不起的, 一支384, 50-500 os +D5100 都可以玩得好開心.  人常說:  "鳥攝是器材先決",  這句話是事實, 只不過並非全部.

反而對鳥攝最多誤解是出自新手, 半鳥攝人, 一知半解..  希望本文對新手有一點幫助  (2013 4月2日 - 完)

點評

感謝 ROL 大師無私分享指導 !  發表於 2013-6-8 12:03 AM
多謝無私指引  發表於 2013-5-11 04:32 PM
Like ! Like ! Like ! Like ! Like !  發表於 2013-4-2 06:53 PM
勁好有心機  發表於 2013-4-2 09:00 AM
Excellent!  發表於 2013-3-28 05:45 PM

評分

參與人數 173威望 +337 收起 理由
cmcheung + 2 精彩內容
Arsenal + 2 精彩內容
TunaFish + 2 專業水準
okaynet + 1 專業水準 有心思!!
majan + 2 精彩內容
simonhingca + 2 精彩內容
MERLINJ + 2 精彩內容
hy_wai + 2
i007 + 2
ken1081b + 2 專業水準
Dcmanterry + 2 精彩內容
老張 + 2 有心思
D3x + 2 精彩內容
F80D + 2 精彩內容
kwan816 + 2 精彩內容
lewiso1127 + 2 精彩內容
kuikui + 2 主題明確
drm + 2 多謝分享!
hkg2468 + 2 精彩內容
一隻小肥豬 + 2 專業水準

查看全部評分

發表於 2013-3-28 00:56:58 | 顯示全部樓層
等大人批支炮預算,請ching比多D料!

點評

rol
你想買邊支大炮 ? .. 正在有好多N684 VR 放二手  詳情 回復 發表於 2013-3-28 10:55 PM
老貓兄,如果 rol 兄俾多 D 料,你大人更唔會批,因為批?你會掛住影打飛唔得閒陪佢!  詳情 回復 發表於 2013-3-28 01:14 AM
回復 支持 反對

使用道具 舉報

發表於 2013-3-28 01:04:23 | 顯示全部樓層
只係想講為何鳥攝愛好者會花咁多錢追貴器材

所以,我放棄了
無錢=與影雀無緣

點評

rol
第一, 二類其實用N384 都影到架啦..  詳情 回復 發表於 2013-3-28 10:59 PM
回復 支持 反對

使用道具 舉報

發表於 2013-3-28 01:08:20 | 顯示全部樓層
師兄, 請你繼續罰打字
其實小弟一直都係網上爬好多文
睇下有無D分享打飛既技術
就算現時財力支持不到, 都得個知字,
試下限米煮限飯,
期待大師你既第4段分享
謝謝你~
回復 支持 反對

使用道具 舉報

發表於 2013-3-28 01:11:38 | 顯示全部樓層
仲有一類更難?係林鳥打飛 (擺景?唔計),簡直可遇不可求!所以去年?公園壽仔,任人打飛真係唔知幾多年先一閏!

點評

rol
可遇不可求的.. 還有3 年前的蛇鵰.. 引來中,港,台雀友慕名而來圍影.. 現在邊有咁好機會影?  詳情 回復 發表於 2013-3-28 11:53 PM

評分

參與人數 1威望 +1 收起 理由
rol + 1 準確捕捉

查看全部評分

回復 支持 反對

使用道具 舉報

發表於 2013-3-28 01:14:09 | 顯示全部樓層
veryoldcat 發表於 2013-3-28 12:56 AM
等大人批支炮預算,請ching比多D料!

老貓兄,如果 rol 兄俾多 D 料,你大人更唔會批,因為批?你會掛住影打飛唔得閒陪佢!

點評

唔係支大炮咁顯眼, 就偷運左入境! 剛剛先成功偷運D7100入境! 又黎想死咩!  詳情 回復 發表於 2013-3-28 04:20 PM
回復 支持 反對

使用道具 舉報

發表於 2013-3-28 02:26:03 | 顯示全部樓層
願聞其詳
回復 支持 反對

使用道具 舉報

發表於 2013-3-28 07:12:37 來自手機 | 顯示全部樓層
好有用呀!小弟都係剛學影鳥,期待第四編!
回復 支持 反對

使用道具 舉報

發表於 2013-3-28 07:55:23 | 顯示全部樓層
Ching你真係高手,影得好正,請問是否全部在南生圍影的!真係精彩

點評

rol
第一類水鳥.. 全部南生圍影..  詳情 回復 發表於 2013-3-28 11:36 PM
回復 支持 反對

使用道具 舉報

發表於 2013-3-28 08:27:49 | 顯示全部樓層
由淺入深,很詳盡的講解,又有圖參照。由於能力所限,自己不打雀,但好喜歡睇打雀照。這篇技術分享比我有好多學習的地方,希望這裡有多些這類型技術教學分享就好了。期待rol師兄的第四part,謝謝分享。
回復 支持 反對

使用道具 舉報

發表於 2013-3-28 09:10:54 | 顯示全部樓層
本帖最後由 kam. 於 2013-3-28 09:12 AM 編輯

好好的分享
4飛翠加魚狗白胸爆水
我唔識影雀都覺得 rol c-hing 呢篇嘢好有心等睇第4部份

點評

"唔識影雀" Kam大師真係謙!!!!!!!!!!!!!!  詳情 回復 發表於 2013-3-29 01:42 PM
rol
頂... 你咪玩野啦... 我仲要跟係學執相..  詳情 回復 發表於 2013-3-28 11:06 PM
Kam 師傅,扮唔識影雀?都啱,你唔係影雀,而係不時放毒!  詳情 回復 發表於 2013-3-28 09:06 PM
回復 支持 反對

使用道具 舉報

發表於 2013-3-28 09:44:35 | 顯示全部樓層
呢篇應該加入精華區
回復 支持 反對

使用道具 舉報

發表於 2013-3-28 09:50:13 | 顯示全部樓層
我都想影雀, 不過唔知買 V2 好, 定 70-200/4 好, 0 號腳夠有突未??   

......  le 輪好多人都係咁問   
回復 支持 反對

使用道具 舉報

發表於 2013-3-28 10:05:18 | 顯示全部樓層
rol兄影得好精彩!!
一步一步討論真系好, 唔識影都可以跟到大家講乜野。
唔知使唔使由Body的Setting講起呢? 因之前聽影雀的師兄講到, 追大鳥同細雀的Setting系唔一樣的,
背景少雜物同多雜物又唔同, 等影開的雀兄回應好了, 小弟未有技術。
回復 支持 反對

使用道具 舉報

發表於 2013-3-28 10:30:31 | 顯示全部樓層
多謝rol兄分享指教. 睇到lee D技術分享ge post 真係好開心. 小弟功力只介乎一致二之間. 細小, 速度快ge雀只能間中打中. 因為佢速度快同不規則飛行, 除時都會轉方向導致好易就甩焦. rol兄可唔可以分享多D心得. 重有rol兄打雀多數落腳架定手持(當然講可以手持鏡如384等..). 小弟覺得落腳架好似重難過手持
回復 支持 反對

使用道具 舉報

發表於 2013-3-28 11:23:13 | 顯示全部樓層
回復 支持 反對

使用道具 舉報

發表於 2013-3-28 13:54:18 | 顯示全部樓層
rol大師出文教學,實在係我輩鳥攝初哥的福音!
DC Home多幾篇這類文章便好了!
請快分享第四類難度啦!
回復 支持 反對

使用道具 舉報

發表於 2013-3-28 14:30:19 | 顯示全部樓層
期待ching the next report:hand shake
回復 支持 反對

使用道具 舉報

發表於 2013-3-28 16:02:31 | 顯示全部樓層
非常精彩 , 非常期待
回復 支持 反對

使用道具 舉報

發表於 2013-3-28 16:20:39 | 顯示全部樓層
jsk_ppp 發表於 2013-3-28 01:14 AM
老貓兄,如果 rol 兄俾多 D 料,你大人更唔會批,因為批?你會掛住影打飛唔得閒陪佢!

唔係支大炮咁顯眼, 就偷運左入境! 剛剛先成功偷運D7100入境! 又黎想死咩!

評分

參與人數 1威望 +2 收起 理由
lphung + 2 精彩內容

查看全部評分

回復 支持 反對

使用道具 舉報

您需要登錄後才可以回帖 登錄 | 註冊

本版積分規則

手機版|Archiver|DCHome

GMT+8, 2017-1-21 11:20 PM , Processed in 0.150271 second(s), 8 queries , Gzip On, Memcache On.

Powered by Discuz! X3.2

© 2001-2013 Comsenz Inc.

快速回復 返回頂部 返回列表