|
本帖最後由 rockyiu 於 2013-12-14 10:53 AM 編輯
2013年接近尾聲, 小弟抽時間總結了今年所影0既蝴蝶. 今年好黑仔, 影到0既品種少得驚人, 人地影到啪啪聲, 我就餐餐食香蕉, 好多蝴蝶都係我有人有, 人有我無, 無乜特別. (今年部電腦都發生災難, 有部份相唔見左 )
以下整理了各科的蝶, 有日期及拍攝地方, 亦偶爾加插一些辨蝶技巧, 希望能為新加入蝶攝的朋友帶來一些方便. 內容應該會有部份錯漏, 敬請師兄師姐們指點.
一, 鳳蝶科
3月6日 大埔滘
褐斑鳳蝶 : 每年開季第一炮, 吸引無數師兄登高響shutter, 號稱蝶界盛事. 佢 既出現, 預示著蝶季開鑼 (2002年漁護署首次發現)
3月6日 大埔滘
寬帶青鳳蝶: 同一般青鳳蝶不同之處在於有條長長的翅尾, 喜歡溪邊吸水, 亦會在山頂盤據, 飛行相當快.
4月1日 鳳園
燕鳳蝶: 係世界最細小的鳳蝶, 能在空中停留及倒飛. 每年鳳園紅花池開, 就會吸引好多攝友爭做趴地熊, 齊齊影吸水同大蛇屙尿
4月23日 水口
綠鳳蝶: 好靚0既蝴蝶, 今年終於影到隻新鮮, 好鬼鐘意食花, 飛行快速
6月12日 朗屏
玉帶鳳蝶: cheap野
玉斑鳳蝶: cheap野
異型斑鳳蝶: cheap野, 分基本型同異常型
6月19日 朗屏
木蘭青鳳蝶: 多在樹林出現, 好鐘意吸水, 今年總算影到交尾
8月7日 髻山
達摩鳳蝶: 華麗0既蝴蝶, 不停飛, 要影佢要付出多D汗水, 不過上得呢座山, 都係想金鳳
10月29日 三亞
裳鳳蝶: 鐘意高處滑翔飛行, 同金裳鳳蝶一樣, 是唯一受香港法例保護的昆蟲. 以前合稱為黃扇蝶.
二, 斑蝶科
6月12日 朗屏
金斑蝶: 靚野通常有毒, 金斑蝶幼蟲愛吃有毒的馬利筋, 並將植物的毒素存於體內, 睇下仲有邊個夠膽食佢. 不在港過冬.
9月8日 鳳園
9月8日 鳳園
絹斑蝶: 冬季會同其他斑蝶一齊保暖過冬
9月27日 鳳園
異型紫斑蝶: 常見種, 過冬斑蝶成員之一
11月8日 石散頭
藍點紫斑蝶
三, 蜆蝶科
9月8日 鳳園
波蜆蝶: 常見種, 喜歡曬太陽, 好鬼懶, 掂佢都唔走, 任影唔嬲
12月4日 元墩下
大斑尾蜆蝶: 三種蜆蝶最罕見, 多在林中小徑出現, 飛行快速, 今年小弟終於有幸影到, 可惜只係記錄相
四, 粉蝶科
3月13日 沙頭角
優越斑粉蝶: 人如其名, 非常優越
4月23日 大澳
無標黃粉蝶: 終於影到佢了, 仲要交尾
9月8日 古家園
檗黃粉蝶: 同寬邊黃粉相似, 但佢 既中室有三撻或以上胎誌, 同埋羅友好圓
10月28日 三亞
寬邊黃粉蝶: 香港最常見的品種, 同檗黃粉相似, 但中室唔會多過兩撻胎誌, 同埋羅友起角
10月28日 三亞
纖粉蝶: 香港好難搵到, 三亞就大把
10月28日 三亞
白翅尖粉蝶: 同樣, 香港難求, 三亞大把. 前翅非常尖, 飛行速度快過火箭.
10月28日 三亞
青粉蝶: 香港未見過. 呢隻爛到阿媽都唔認得
12月2日 龍鼓灘
菜粉蝶: 同東方菜粉最大0既分別係, 佢乾淨D
12月2日 龍鼓灘
報喜斑粉蝶: 我明佢真係好cheap, 甚至乎開車都可以撞死幾隻, 烏蛟騰每年春天都至少幾百隻同時見到, 但佢真係好靚, 個名又好意頭, 報喜!!
五, 蛺蝶科
3月6日 大埔滘
雙色帶蛺蝶: 除左上山頂影褐斑鳳蝶外, 可以順便影埋呢隻好野, 佢係香港五種帶蛺蝶中最罕有, 有登峰習性, 經常同其他蛺蝶激烈追逐
9月16日 大埔滘
相思帶蛺蝶: 同雙色帶蛺蝶, 兩隻都好似樣, 合翼分辨0既位置係睇佢最近頭部0既白色條紋有無斷裂, 有0既就係相思, 痴埋就係雙色
3月6日 大埔滘
離斑帶蛺蝶: 雄蝶都係鐘意上山頂搵食, 鐘意企葉頂守護領域
3月6日 大埔滘
丫紋俳蛺蝶: [俳]係讀 [排]音, 唔係讀[非]音, 記住記住
3月18日 大埔滘
電蛺蝶: 翅膀強而有力, 閃電咁快, 影佢要落閃, 不過呢兩張影得好核突....
4月14日 烏蛟騰
金蟠蛺蝶: 前翅邊緣有明顯粗身橙色條紋
6月7日 古洞 8月7日 髻山
玄珠帶蛺蝶: 最後一道白斑有黑點, 好易認
6月7日 牛潭尾
散紋盛蛺蝶: 紋理好散亂, 有集體吸水0既習性
6月10日 朗屏
幻紫斑蛺蝶: 無論仔定女都好, 都有守衛領域0既行為, 行開左, 好快又番番原位.
6月12日 髻山
黑脈蛺蝶: 雄蝶有登峰習性. 聽D前輩講, 呢隻眼睛有機會係黃色, 所以唔好一見黃眼就話人係芒蛺
6月12日 朗屏
網絲蛺蝶: 地圖一樣0既蝶, 鐘意搖搖擺擺成個酒鬼咁低飛. 我鐘意黑絲多D
6月19日 朗屏
芒蛺蝶: 咸蛋超人呀!!!
7月30日 鹿頸
忘憂尾蛺蝶: 個名改得好靚, 可惜佢鐘意食s 
7月30日 鹿頸
美眼蛺蝶: 多出現在草原和廢棄田, 鐘意灑太陽, 速度唔高.
8月2日 鹿頸
彩蛺蝶: 無端端今年爆左呢隻彩蛺, 搞到鹿頸陸沉都似, 高峰期過百人. 小弟都去左幾次, 諗住三號風球唔掂啦, 最終皇天不負有心人, 得嘗所願影到記錄照
8月7日 龍鼓灘
璃璃蛺蝶: 好奇特0既外形, 佢飛得快, 怕人, 但只要我地停耐少少, 佢就會番番原位, 好過癮.
8月12日 馬鞍山
殘鍔線蛺蝶: 隔肋底有五個黑點
8月12日 榕樹澳
穆蛺蝶: 佢地唔係好肯落黎凡間俾攝友, 今年算幾lucky.
8月28日 嘉道理觀音山
窄斑鳳尾蛺蝶: 雄蝶有登峰習性, 有強烈0既地域意識
9月20日 髻山
金斑蛺蝶: 又係鐘意扮金斑蝶個樣, 扮有毒. 囡好難搵, 囝就山頂比較易見到
9月20日 髻山
小紅蛺蝶: 有小紅0既地方, 好多時有大紅
9月20日 髻山
大紅蛺蝶: 有大紅0地方, 未必有小紅. 兩者分別在於, 大紅隻眼紋無咁清晰
9月20日 髻山 10月8日 東涌
婓豹蛺蝶: 豹妹外形模仿有毒0既金斑蝶
10月1日 東涌
翠藍眼蛺蝶(囝): 聞說該地要擴建醫院, 希望佢地能夠再搵到另外一個家啦.
10月28日 三亞
爻蛺蝶: 香港唔覺有記載
10月28日 三亞
綠裙玳蛺蝶: 香港唔覺有記載
10月29日 三亞
黃裳眼蛺蝶: 近年香港已經近乎絕跡了, 之前天水圍仲有零星發現.
12月2日 龍鼓灘
琺蛺蝶: 鳳園果轉琺蛺潮小弟未遇上, 要遠在屯門才能一嘗所願.
12月2日 龍鼓灘
紅鋸蛺蝶: 黎龍記唔會少得佢地, 紅色係囝, 灰色係囡
六, 眼蝶
3月13日 沙頭角
長紋黛眼蝶: 眼紋好散
3月24日 烏蛺騰
白帶黛眼蝶: 常在同一地方駐守
4月1日 元墩下
翠袖鋸眼蝶: 市區都可以見到
6月7日 牛潭尾
小三矍眼蝶: 我鐘意小三..... 呢個名
6月7日 牛潭尾
黎桑矍眼蝶: 十分常見, 咁都影, 只因佢交尾\r
7月5日 深圳
蒙鏈陰眼蝶: 深圳東部華僑城影0既, 趁老婆做spa, 偷跳半粒鐘 
七, 灰蝶
3月24日 烏蛟騰
黑丸灰蝶: 烏蛟騰地標性物種, 今年都仲係影唔到雙丸
9月27日 石散頭
一點灰蝶: 單丸, 同佢大佬黑丸都幾似, 不過佢後面無橙黃色紋
4月1日 元墩下
鈕灰蝶: 普通到不能再普通的蝶
4月23日 大澳
薰衣琉璃灰蝶: 有機會係薰衣, 但唔sure, 我見佢格肋底好似無黑點.
4月23日 大澳
細灰蝶: 首嘗細細交尾
6月3日 深圳
酢醬灰蝶: 上深圳影荷花時, 順便影下3P
6月12日 朗屏
燕灰蝶: 秋季最多, 囝中間有圓形性標
8月19日 古洞
玳灰蝶: 同燕灰頗相近, 但開翼就一清二楚了, 呢隻開翼係紅色, 好易認.
6月19日 大埔滘
古樓娜灰蝶
11月8日 烏蛟騰
雅灰蝶: 同古樓娜灰蝶相似, 但佢開翼有亮亮0既金屬藍
6月19日 髻山 10月4日 髻山
綠灰蝶: 通常囝靚過囡, 但今次例外, 綠灰囡有條白色長尾, 靚好多.
6月12日 髻山
雙尾灰蝶: 雄蝶有登峰習性, 多在樹林或柑橘園出現
8月7日 龍鼓灘
珀灰蝶: 同雙尾灰好相似, 但一睇隻眼就分到了, 珀灰隻眼係白灰色
7月5日 深圳
曲紋紫灰蝶: 有蘇鐵的地方就有佢 (都係趁老婆做spa 偷出來影0既 )
8月7日 龍鼓灘 11月8日 烏蛟騰
紫灰蝶: 典型0既濕旱季蝶, 旱季D蚊淡好多
7月14日 髻山(濕季) 12月4日 元墩下(旱季)
鐵木萊異灰蝶: 奇特0既紋理, 濕季同旱季個體差異大
8月2日 鹿頸
斑灰蝶: 九里遠斑灰一隻
8月12日 古洞
銀線灰蝶: 真係有條銀線!!
8月19日 古洞
豆粒銀線灰蝶: 同銀線灰蝶好相似, 關鍵在豆粒係三粒, 而銀線灰係三條線
9月16日 大埔滘
亮灰蝶: 一隻普通得黎, 我幾鐘意0既蝶. 好易認, 後翅有條好粗0既白色紋
9月16日 大埔滘
素雅灰蝶: 今年素雅灰蝶大爆發, 度度都有咁滯, 仲要隻隻新鮮!!
9月27日 石散頭
斜斑彩灰蝶: 雖然好多地方都有, 但交尾喎, 照影.
10月1日 石散頭
美姬灰蝶: 今年人人都影到交尾, 我就去三次蕉三次
10月8日 東涌
藍灰蝶: 今年超新星, 呢隻蝶香港記錄絕無僅有, 但今年東涌場大家都happy, 但歡樂時光過得特別快, 起醫院就要say goodbye
10月8日 東涌
棕灰蝶: 荒棄草地/農地 比較容易搵到, 同長尾藍灰蝶好相似, 但有個地方好易辨認, 睇佢條尾. 棕灰蝶條尾位於兩眼中間, 長尾藍灰位於眼斑下
10月28日 三亞
鹿灰蝶: 海南特產, 香港無
10月28日 三亞
曲紋拓灰蝶: 海南特產, 香港無, 我0既致愛
10月28日 三亞
疑波灰蝶: 早幾年都聽到有師兄0係香港影到
10月28日 三亞
豹灰蝶: 既然0係香港失左蹤, 唯有去三亞搵啦, 點知果度周地都係, 影到唔想影
12月4日 元墩下
蚜灰: 今年同牙仔無緣, 鳳園個個都影到, 仲要交尾, 我就只能在元墩下執番個安慰獎
12月4日 元墩下
百嬈灰蝶: 算係五種嬈灰最常見0既一種, 同部份斑蝶一樣, 佢都會0係香港集體過冬
12月4日 元墩下
緬甸嬈灰蝶: 綠眼仔, 一般在樹冠活動, 朝早有機會落低位
八, 珍蝶科
珍蝶香港只有一種, 中國只有兩種, 飛行緩慢. 受刺激時, 會分泌出有毒液體.
9月27日 川龍
苧麻珍蝶: 珍珍薯片只有一種, 聽前輩講, 影珍珍, 影到一隻就係肥佬, 交尾就勉強合格, 成個蝴蝶變態過程影晒先稱得上收貨.
九, 弄蝶科
3月13日 沙頭角
寬鍔弄蝶: 非常細小0既弄蝶, 只比最細0既侏儒鍔大小小
3月24日 烏蛟騰
黑斑傘弄蝶: 黃昏及陰天最為活躍. 小弟同呢隻蝶硬無緣.
7月30日 鹿頸
綠弄蝶: 黃昏蝶, 鐘意藏在葉底, 通常要落閃
3月29日 烏蛟騰
瑪弄蝶: 多在竹林附近出現, 一雙紅眼好易認.
4月1日 元墩下
沾邊裙弄蝶: 同黑邊裙弄蝶相似, 關鍵係佢少左兩粒黑點
4月14日 烏蛟騰
百觸星弄蝶: 最鐘意藏在葉底, 搵佢一D都唔易.
4月23日 水口
雙斑趾弄蝶: 殘到咁都影, 無話可說
6月7日 牛潭尾 7月14日髻山
白彩弄蝶: 最鐘意呢隻鬍鬚仔了, 今年兩個地方都遇上
6月19日 朗屏
角翅弄蝶: 鐘意開翼吸花蜜
7月24日 河上鄉
雙子酣弄蝶: 近年香港只有零星個案
8月2日 鹿頸
姜弄蝶: 姜花開, 就會見到佢\r
8月25日 嘉道理觀音山
雅弄蝶: 飛得好快, 但唔飛得遠
9月16日 榕樹澳
希弄蝶
10月8日 東涌
三斑趾弄蝶: 係香港五種趾弄蝶中相對較常見0既一種, 呢隻蝶禁左兩下shutter就飛到無影了, 好彩都中焦.
|
狗仔卡
發表於 2013-12-12 04:03:18
提升卡
沉默卡
喧囂卡
變色卡
千斤頂
顯身卡
發表於 2013-12-12 05:40:34
發表於 2013-12-12 19:36:27