馬來西亞蝶雀景

rockyiu · 發表於 2014-4-24 23:19:36

本來此帖發在Canon樂園區, 版主希望小弟能轉載在此, 重複發帖, 大家莫怪

_____________________________________________________

這個四月, 小弟同一班老豆會成員, 一行五人, 浩浩蕩蕩遠征馬來西亞. 一心諗住打蝶為主, Part Time 打雀, 經蝶友介紹了一位操廣東話的生態導遊, 短短六日內, 幫我地處理了食住行, 非常貼心及專業! 再有下次, 唔使諗, 我會再搵您

日期: 2014年4月6日-11日
地點: 馬來西亞 Gopeng (近怡寶, 檳城機場約需2.5小時車程)

是次裝備如下:
1. 相機: Canon 5D3
2. 鏡頭: 17-40, TSE17, 180L Macro, Tamron 150-600 VC
3. 閃燈: 270 EX II, Mt24 EX Macro Twin Lite
4. 腳架: 賓佬2號

蝴蝶篇:
小弟香港影蝴蝶都有段日子, 今次第一次出國影蝶, 大開眼界. 0係香港, 好少會深入樹林, 暗淡無光的環境影蝶. 今次去到大馬, 完全係投晒降, 平時打蝶的方式行唔通, 感覺就好似回到第一次影蝶的情況. 唔識習性, 唔識搵蝶, 唔識影蝶, 最慘0既係, 唔識辨蝶.
六日行程, 實際得四日半, 計埋馬拉每到下午必落雨的惡疾, 影蝶的時間可謂少之又少, 大概只能影到八十種蝶. 期望日後捲土重來, 影到更多罕有的品種.

影蝶當然首選微距鏡, 小弟今次的蝴蝶相都係用180L影. 呢支鏡老當益壯, 各樣野都俾到滿意水平你, 但無IS係就係致命傷.

馬拉國蝶, 多到呢....

此行最大收穫, 就係影到呢隻弄蝶. 據講馬拉方面尚未有記錄的品種

目標蝶, 任務完成

呢隻條尾最長

藍寶石

開翼係咁

令香港蝶界瘋狂的靈奇尖粉蝶, 0係呢度只能成為佈景版.

仲有好多蝶不能盡錄, 有興趣的朋友可以click入去睇下(都只係一部份

)

灰蝶篇 - http://www.dchome.net/forum.php?mod=viewthread&tid=1256576&page=1#pid14845584
弄蝶篇 - http://www.dchome.net/forum.php? ... 6580&extra=page%3D1
鳳/斑/粉蝶篇 - http://www.dchome.net/forum.php? ... 6587&extra=page%3D1
蛺/眼蝶篇 - http://www.dchome.net/forum.php? ... 6585&extra=page%3D1

馬來西亞影蝶要留意的地方:
1. 如果要影罕有的品種, 非要進入樹林不可. 樹林蚊唔多, 但係有螞蝗(蜞?)等緊你

佢會不知不覺地進入你的身體, 然後大肆吸血. 小弟今次都被吸血4處地方, 雖然唔痛, 但係個樣好核突, 滑shan shan, 仲會攪到成灘血, 好恐佈. 故此緊記將衫褲鞋襪束好.
2. 帶備水鞋. 因要澗水而過, 故此高筒水鞋係必須的. 由於水鞋鞋底太硬, 建議購買舒適鞋墊.
3. 3月或4月去馬來西亞會較好, 4月打後開始進入雨季, 一落雨, 就係雷雨. 事實上, 我地今次, 每日下午都落雨......
4. 天氣炎熱, 記得補水. 請常備樽裝水.

影蝶技巧:
1. 不斷搜索: 香港影蝶, 好多時只係一個小地方搵蝶, 或者採取守株待兔式等待. 但山長水遠去到馬拉, 當然要爭取時間, team work 好緊要, 大家各自分配一個地方搜索, 搵到出聲, 影完行開繼續搵蝶, 第二個埋位影蝶. 切忌一窩蜂去影一隻蝶, 咁樣非常浪費時間. 切記切記. 我地今次就係無咁做, 所以蝶影得好少......

2. 唔好磨爛蓆: 香港影蝶, 好多時會為一隻蝶影十數張唔同角度, 務求影得靚. 但馬拉蝴蝶品種過千種, 不要浪費太多時間去影好一隻蝶, 而錯失了前面更多更罕有的品種. 第一次出國影蝶, 應先以記錄為主, 待有經驗後, 先要求盡善盡美.

3. 配備閃光燈: 閃光燈好重要, 森林裡好暗, 唔落閃你基本上張張要ISO 3200. 另外, 有D蝶種, 一D金屬的鱗片, 落閃先會靚. 用閃的機會率好高, 故此記得練習好用閃技巧, 再加上一個好的柔光罩. 閃燈以輕便為主, 270EX II其實都有唔錯效果(體力夠的話, 當然大閃最好). 可以的話, 離機閃會更好.
無落閃

有落閃

4. 長短炮: 最好微距鏡 + 384. 微距鏡影蝶係必然, 但384 係森林影蝶發揮至關重要的作用. 森林蝶太alert, 很難埋到身, 遠距離影左先, 總好過微距步隊嚇走晒D罕有蝶. 友人用支5058, 諗住一鏡兩食, 但去到後期, 體力下降得好緊要, 安全快門一而再地推高, 但光圈亦只能F8, 侷住高ISO, 炒相機會大左好多. 因此我建議最佳係384, 一來夠輕, 二來有IS, 三來光圈大.

5. 越罕有的蝶越敏感, 小小氣流都會嚇走隻蝴蝶. 見到目標蝶, 先舉起部機, 眼貼住view finder, 放輕腳步, 步伐要夠大, 行近一步影一張, 切忌影完睇相! 因為睇相時, 部機向下移動產生氣流, 蝴蝶會好易被嚇走. 影後, 不能向左向右走, 只能向後退. 向左或向右, 蝴蝶最容易察覺到.

6. 唔好太急: 人越急, 越容易嚇走蝴蝶. 切勿蝴蝶剛停下來, 就走去影, 咁樣一定會嚇飛. 應該等候蝴蝶停下來一段時間, 或者看到蝶尾點一下地, 呢個時候先慢慢接近. 最好用閃閃佢一兩下, 等佢習慣左之後, 你就可以好近埋到身, 任影唔嬲.

今次除左影蝶, 亦會part time影埋雀. 同香港打雀好唔同, 我地今次係坐在車內, 伸出窗外影. 由於地方狹窄不能落腳, 所謂的落腳升反光板快門線低ISO 影, 0係呢個地方完全不可行.

不過亦正因為咁, 可以試到龍仔支8568於一般手持使用下的成像, 感覺尚好. 我支鏡自己cal左先去馬拉, MA要-12. 而同行友人, 支8568更加要調到-14或以上

成像係點, 大家可以睇下.

如果影打飛, 就考起呢支鏡, 成功率會變得好低.

更多雀相, 可以click入呢條link
http://www.dchome.net/forum.php?mod=viewthread&tid=1255617&extra=page%3D1

我地要求多多, 有蝶有雀影, 都唔夠, 仲要求導遊帶埋我地去影下日出日落. 導遊真係厲害, 乜都掂!