攝影心得和小故事 (小小分享不是精華)

pak327

註冊左咁多年,都未試過分享下心得,眼見CANON板好似唔係太精神,有感而發試下學人寫心得先.

剛出黎打工就買了第一部佳能相機 CANON S30,成部磚頭咁都日日放在背囊周圍影,日影夜影,機不離身.
但由於機能所限,就想買當年已推出的CANON EOS 300D,雖然家不富有,而且早已聽聞玩女人,音響,相機會係好敗家的事,但我當然冇理啦.
在儲錢期間原來將會有新機推出,一等就半年,正是CANON EOS 350D!!! 推出後不久和格價後就去了中環相機街買了第一部DSLR - 350D Kit Set
心諗真係好貴,我一定要日日用先對得住佢.
在350D的攝影生活中,快樂無比,在我的朋友圈中我萛是第一個識影相的人,在各大大小小的節目活動中我都擔任攝影師一職,大家在收到相片的一刻所有朋友都有講有笑,非常開心快樂.
咁就過左幾年,期間都有換鏡頭,閃燈,腳架,相機袋的問題,稍後會再分享.
之後發覺APS-C真係對鏡頭的一大阻礙,所以便在推出當日在成成購入最新的CANON EOS 5Dmark2. 功能之?大直至現在我還是使用它.

講下個人小小資料先,從事設計的我對顏色和構圖都有D要求,而我拍攝主要項目有:
風景相:


郊遊相:




旅行相:


朋友活動相:



貓貓相:


星空相:


幫家人影証件相,幫公司影PRODUCT,

最重要就係人像相(老婆)和七月後的BB相.





我相信大家基本上都係同我差不多...掛

而在兩年前誤打誤撞下拍埋緍禮片(主要係幫助賺錢買器材)
https://vimeo.com/78414946

打到手軟,一陣再講下CANON器材.

pak327

在攝影生涯中,接觸過好多相機,鏡頭和配件,當中不論係日本,大陸還是外國我都會用 "每件產品都是好的" 去對待,只是對象不同和使用者的用途擺了.
我試簡短說出我使用過的作出評價,呢度係CANON板當然係CANON用到啦,唔會無啦啦講NIKON14-24掛(當然係用到啦)

==============================================================================================================================

相機編:

入門機:
EOS300D(朋友的) - 一個字"灰"! 唔知點解影出黎的D 相都好似有層霧咁,還是我當時試用時技術差? 還是個迷!
EOS350D(自用的) - 輕! 大部份靚相都係用佢,反而買左5D2之後都冇350D影得咁多相.所以我覺得重量係同攝影有關的. 而上星期我囉返出黎用,還是OK WORK,不過個MON真係細左少少.
EOS400D(朋友的) - 我借用了數天,感覺同350D一鬼樣,冇理由會升級.
EOS450D(朋支的) - 我只係摸過下,好似比350D實在,ISO方面都好好多,但都係冇理由要升級.
EOS1000D(朋友的) - Sorry我覺得CANON有少少呃錢成份.

之後去到現在的760D都冇朋友再買,有些已升級或已經唔再玩攝影.

中階機:
EOS20D(在店試) - 其實我真係想買呢部多過350D,ISO又好D,又實在D,但真係冇咁多錢.
EOS40D(朋友的) - 朋友由300D upgrade上黎,之後玩多半年又冇再買攝影,我就借用之後幫佢賣出.畫面真係好過350D太多了,但那時我記得係打風落雨,冇咩心情出去影相,所以我覺得天氣係同攝影有關的.
EOS60D(公司用) - 接觸得太多,冇咩感覺. 但公司係用28-135 IS,發覺唔係太sharp.
EOS60Da(朋友的) - 攝星朋友的,實用的天文器材,但其實60D改filter會更平.
EOS70D(朋友的) - 第一次覺得aps-C係好過Full Frame....for拍片,真係好用到不得了,我估計在緍禮拍片用呢部機可用多3-4年,因為好多酒店酒樓還是用DVD機播片,想插手指都冇.

FF機:
EOS5D(同事的) - 教我影相的同事用的機種,望落去個viewfinder真係大到冇人有,ISO又勁,鏡頭又解封,所以先會考慮upgrade Full Frame機,最後都買了5D2(你估我真係咁有米咩,成2皮野買部相機),可惜呢個同事已冇再玩攝影.
EOS5D2(自用的) - 正啦緊係,咩場合都用到,到而家拍埋片又得,其實在攝影普通相唔係太大要求已經好好,所以我就留返D錢唔upgrade而買鏡頭.
EOS5D3(同事的) - 我真係覺得同5D2差不多,只係多左headphone out先有少少想upgrade. 咁ISO在新機黎講就緊係好好多,只係我好少多過ISO3200,所以我估計應該分別不大.

頂級機:
1DV(朋友的) - 借用影了幾筒正負片,當中的手感,快門聲,功能,ViewFinder又大,果然名不虛傳的機王,一個字"爽"!!!
1D2(朋友的) - 在緍禮攝影中的王者,雖然係貴,但各方面都功能的確係"勁",而且對客戶的內心有一定的肯定, 所以我覺得外表係同攝影有關的.
1D3(朋友的) - 用在工作上,而這位朋友都已說明家中有5D3,1D3只會在拍攝工作才會出動.
1DX(朋友的) - 不用介紹的機王!!!但這個朋友平時係係用iphone影相,包括旅行及生活照,1DX係出job用,佢成日同我講:囉咁大部出街咁辛苦都唔知為咩.

==============================================================================================================================

鏡頭編:

由於試過太多鏡頭, 我只分享我曾經擁有的.

原廠
EF24/1.4II - 或多或少鐘意CANON都係因為佢. 攝影/拍片效果都好好. 室內人像,藝術館(唔可以用閃燈),食物相,星空相,Snapshot...真係飯飯掂,值得入手的其中一支鏡頭.
EF35/1.4   - 買回來諗住好似其他師兄咁長插, 又真係不錯喎, 比50/1.4 wide少少而又有散景,Snapshot一流鏡,唔怪得Leica都出咁多35mm呢個焦距啦. 但我因為想試下24/1.4的威力,才會割愛出售.
EF50/1.4   - 和350D時代的最佳拍檔,輕巧與質數並全的流動器材.好多人話個USM好容易壞,但又如何? 支鏡的焦距在APS-C 變左人像鏡, 個個女仔朋友當時睇到個散景,即劇話你好叻呀!點解我咁靚既?點解既?點解既? 抵返曬啦,講完!
EF50/1.8II - 當買左350D後再購買的第一支定焦,好好用!散景淺景深大光圈真係令我進入另一個世界...深坑! 但用左一段時間後送了給朋友希望毒到佢,當然我係想再上一層樓的50/1.4啦.哈哈!
EF85/1.2II - 上左FullFrame後感覺50/1.4wide左少少冇左果種壓縮感,所以又賣左佢而入左呢一支人像神鏡,但對焦真係廢,基本上7成時間都係用MF. 都係因為呢支鏡出黎D效果抱得美人歸啦(誤!)
EF100L     - 女王無啦啦話想去花展影相,無啦啦就買左呢支,起初真心覺得好難用,但日子耐左你會覺得佢係超方便,而且真係利到冇朋友.現在出videojob都一定帶埋佢去,正! 不過個人覺得唔影微距或諗住用黎當人像則不建議買.
EF135/2    - 真心覺得呢支先係真正人像王(有地方的話),壓縮感好?,比起70-200II輕又sharp又平又大一級,如果唔係重組鏡頭我都唔會賣,而且+1.4XII後作天文攝影效果都不錯.如果佢出IS板我一定會再買返黎.
EF200/2.8  - 我本身個攝星儀support唔到太重器材,才會入呢支鏡主力係影星. 無咩特別只係要它的焦距和光圈. 買左1.4XII後插在135上,呢支就更無用之地而出售.
EF300/4    - 第一支定焦L鏡,同事的朋友平賣給我,打過雀,打過賽車,打過足球,都不是我杯茶所以用了半年左右就賣了.
EF17-40    - 唔洗講野,平!靚!正! 焦距在旅行,大景時超好用. 因為我用呢支9成都係落腳架f8以上,所以諗唔到有upgarde去2.8 或 f4IS的理由.Canon人點都要有支Ultra-Wide先掂.
EF24-105   - 二手買真係平到笑. 呢個焦距真係影乜都得,可以話係萬能,拍片又有IS防手震,對拍片手持真係好重要.如果要upgrade唔會係2.8或24-70/4,只會係Tamron 24-70/2.8 VR. 因為我冇IS唔掂.
EF70-200/4 - 起初二手買黎試下,真心感覺麻麻.以為長焦冇IS點都係要落腳啦, 但落腳後其質數都係一般,光圈又細倒不如100-400.但放售後已沒有再買TELE ZOOM鏡.
EF-S 10-22 - 350D+10-22係我人生中最快樂的時光.重未接獨過咁wide既相,基本上我的相有一大半都係佢影的.到而家睇返D相都自我感覺良好(係冇咁sharp囉)哈哈
TS-E 24II  - 朋友俾我長期借用的鏡. 非常特別,第一次上手好似完全唔識影相咁,但就係咁好似令我再有返影相的果團火,更有一刻想全部轉曬做四支移軸.

副廠:
Zenitar 16fish - 第一支魚眼,平價上車之選,可以試下魚眼的效果睇下自己啱唔啱心水. 我就麻麻,但又平又細支,會長keep實有機會用到.
SIGMA 30/1.4 - 好鏡一支! 上了FullFrame後割愛出售
SIGMA 24-70/2.8-4 - 我好想講呢支實在好雞,要收到好細光圈先sharp.其後買左24-105後即放.
SIGMA 70-300 DG - 第一支長鏡,二手買$900.雖然咁平但又係比左我好多快樂時光,最早期的日出太陽,日落咸蛋簧都係靠佢.重要有秘技扭大力D某個位變左微距鏡,真係神奇!!!
TAMRON 90/2.8 MARCO - 買黎諗住當人像鏡同埋影下玩具,又平又sharp,但比較少用而我冇錢又想試其他鏡先才出售. 好鏡一支!!!
TAMRON 28-75/2.8 - 又係平!靚!正!的標準鏡. 初次試到ZOOM鏡恆定2.8的快感.對焦係慢但當時冇對比下乜都冇所謂,最緊要有得用. 當時10-22+28-75+50/1.4係我的最TOP器材(笑!)
ZEISS OTUS 55/1.4 - 我比較鐘意MF,所以呢支神器諗左好耐又得到優惠價下買左返黎.真係SHARP到冇曬朋友.其實我都唔想咁揚同成日俾人望又俾人問可以唔可以借黎試,所以賣給好友. (其實我都係鐘情Otus85mm)
CONTAX 21/2.8 - 我成日影景就諗住試下呢支風景王. 但老實覺得吹多過實,係Sharp但如果落腳細光圈同17-40差不多,玩左幾個月就放.


利申: 鏡頭重組中,現在暫時只有5支鏡
Zenitar 16mm/f2.8 Fisheye
EF 24/1.4 II
EF 100L
EF 17-40L
EF 24-105L

pak327

相機配件編：

腳架:
BENRO不知型號腳 - 我第一支腳架係Benro普通腳架一支,上山下海都係用佢,以前的BENRO都幾硬淨用到而家都未爛送左俾個朋友用,因為我成日插落水先令個扭膠位塊膠鬆左.
Gitzo G1540T - 因為成日上山下海,所以一買就買左Gitzo反腳,每一次去攝影包括外遊公幹或光天白日都會帶,總之出動當年的350D或現在的5D2,一定會帶埋佢。開頭朋友都話我On居,加埋波頭成7k,但經過就黎買左9年的光陰,乜都抵返曬啦.

波頭:
Velbon QHD21 - 一開始擔佢日本造而又細,當時用350D kit+50/1.8 + sigma 70-300都冇問題,但一換到大少少的鏡,又要換波頭了.
Giotto MH1200 - 諗住QHD21唔掂就買個大D,真係實在,但真係好重,支Benro好似唔係太頂得順. 但我覺得呢個牌子在實用性的確不錯.
Markins Q3TR - 為了買Gitzo反腳下,上了DChome做了好多功課後買了呢隻波動,又係會俾人話發神經,因為加埋塊5D2 L架成3千幾蚊. 但都同腳一樣用左咁耐. 抵曬!!!

閃光燈:
Sigma 500DG - 當時我完全唔識用,摸下摸下,睇下書,睇下DChome,又學到野. 但得罪講句現在的"燈光人像研討區"好似死曬咁,冇人post野,而睇返d 舊post又是好似唔稱得上係研討.
580EX II - 想再更上一層樓學人玩飛燈,所以就買黎學飛兩支,從而領會到一件事,就係千其唔好直打,如果覺得麻煩唔想慢慢set燈,還是買支大光圈更好.

相機袋:
Point底褲袋 - $90!!! 由350D一直用佢,真諗唔到有咩壞處.
LowePro Rover AW II - 係貴左d但勝在上山下海都方便,但真係唔太好咩. 但因為外型好,布料又耐磨,令我一直都對Lowepro有好感.
Lowepro Reporter200 - 第二個Lowepro袋,$450用左6年而家都未爛,但可惜現在我頸有少少問題唔可以再用重型單咩而送左俾朋友.
Billingham Packington - 型! 好鐘意好Vintage,但用上手係華而不實,而家又單咩唔到重野,而家變左返工袋.不過又真係好耐用.
F-stop內擔+行山背囊 - 今年先開始買咁既配搭,非常舒服又方便,因為我係買左一個可以背面開打開的行山背囊,用左半年都感覺良好.(背囊是用Mammut Nirvana Pro 35L)

Filter:
UV - 開始時係用Kenko或Hoya,但之後冇再用UV轉曬做Protecter或直接唔用.
天涯鴨記濾鏡 - um...真係用左幾次就放低冇再用,可能太膠吧. 有想過轉Corkin,但好似太貴又唔係太常用.
Kenko CPL Pro - 唔錯又簿,多數鏡都用佢,階因頂級的B+W係合唔到鏡頭蓋咁攪笑.
B+W XS-PRO MRC NANO KSM CPL - 最近買的因為可盒鏡頭蓋就試下,一試之下真係一分錢一分貨.當然有好多選擇,只係我覺得小心用係會用得好耐.(Kenko兩塊唔同Size的CPL都跌爆)

Shutter線:
Canon RS-80N3 - 好彩當時見到有二手半價即買,影相冇可能冇.而家都好d好多大陸貨,我係唔介意的用到就OK.
YONGNUO MC36R無線Timer - 自拍神器,放在褲袋扮插袋按快門,神不知鬼不覺,直到現在都使用中.

Kanon

加油👏🏻👏🏻👏🏻👏🏻🎉🎊🎉

kmteric

charles2

勁!

marksman01

加油x2

manman1998

正,有鼓勵

我35OD影左約7萬快門

rockyiu

師兄果然言出必行喎。
大家出多D post,做旺下呢度

黑星

多謝師兄分享，加油

Ryeung02

師兄好嘢, 多謝分享.

aaronchan

個老婆咁靚當然唔洗去影會啦

sonyff

bangbenbang

aaronchan 發表於 2015-6-10 02:26 PM
個老婆咁靚當然唔洗去影會啦

個老婆咁靚當然唔洗去影會啦

bun1230

多謝師兄分享
好圖！

Giles

出動到太太最靚係你啦

aeroplane8340

bangbenbang 發表於 2015-6-10 03:15 PM
個老婆咁靚當然唔洗去影會啦

個老婆咁靚當然唔洗去影會啦X2

maplefta

值得鼓勵

星願小王子

又係另一藉口唔好入來咁多，D相太毒，好易領嘢

henry_cc

我都覺得重量係同攝影有關的,同埋年紀都係同攝影有關的