雖然，玩相機十幾歲就開始了，但一如大部份香港人，為口奔波，結婚生仔、養兒育女，中間有差不多十幾年無『正式』掂過相機了。。
真正令我重拾相機的，係鐵道攝影。

2000年以後，正式學習電腦同網上知識，上網自不然多左，對鐵路自少就有濃厚興趣(七歲時就係家中大廳，趁住屋企無人既幾個鐘作左一幅12X4尺既火車運行圖大作，當年大人見到我係既怒又好笑！)，上網梗係睇下火車啦。。
於是開始發掘到一個龐大團体——火車迷，日積月累咁睇人地既相片，唔得，要自己都影返幾張先。。
剛好，細路開始大喇，時間開始多喇，於是投入鐵路攝影既時間又多左喇。。

近日因LR操作熟識多左，於是手痕從新為當年既相片再編修一次(哈哈，數碼攝影真係方便！)。。。
由於早期全部係JPG作品，大約係D800E以後先『真正』全部影RAW，所以貼出相片係由2012年開始。

廢話太多喇，無圖大家唔高興的，貼返幾張翻修圖先。。
機型方面，有D700、D3s、D800E、D7100，大家可以睇下原本呢三部機原相效果個分別都幾大下，但係『統一概念』既翻修之下，個效果又相差幾遠呢？

地點係江西贛洲市，贛龍鐵路跨貢江大橋橋上，D800E，A模式，ISO200，1/2000秒快門，f/4.0光圈。
需要說明既係，大家可以見到火車頭已經好接近，當中『偏角率』變化會非常快速，由是必須要用『高速快門』先可以凝結影像，當日天氣雖然唔好，但我依然寧原用高一點ISO，都要保持住較高既快門速度。

DSCF3081 by jeremyMak, 於 Flickr

DSCF2957 by jeremyMak, 於 Flickr

ironridder 發表於 2015-8-23 10:23 PM
我的火車之旅，都唔知幾時成行，睇怕都要退休了，德國同日本係我既目標。。

德國火車我乜都唔知TIM

雖然話，鐘意影相又鐘意火車，但仍然有技不如人既感覺。。
還好，呢張火車捐山窿相片，得到某火車網站採用。

呢一次係我最滿意既鐵路行攝旅程，當日帶備4公升水+午餐干糧，早上六點出發上山，八點前趁住鐵路員工末返工上到預定線路地點。
目標係罕有既『七橋七隧』連環圖像。。
但仍然礙於技朮，無法有效咁表達心中所想。。
雖然係咁，係山上依然好開心咁玩左八粒鐘，食同屙都係山上，呢個就係玩鐵路行攝必須要付出既代價來。

今時今日再去既話，技朮肯定會好一點，但係，已經事物全非了。
已經影唔返呢種感覺了(圖中機車，已退出當地線路運用。)。

機身D700，鏡頭係S50500OS，當時應該係過緊第三同第四個隧道之間，睇準機車露出到再次進入隧道一剎那按快門。
其實，呢張相，當時經驗不足，影得唔係幾滿意的。

地點係京九線和平段(廣東東部接近江西省界。)，機車係DF11G，由於車頭外形似豬，再加上型號有『G』字，所以花名叫做『豬頭』。

作為鐵道火車迷一員，肯定會消息靈通的。。
下圖係DF11柴油機車最後進港既片段。
基於環保等原因，自始之後，香港段直通車已經變成只有電力機車牽引了。

當日，為左拍得好照片，帶備上鋁梯，因為香港鐵路係全封閉鐵路，全部有高欄，要避開高欄就唯有向上爬。。
機係D700，鏡頭係AFS70-300VR。

地點係沙田火車站至火炭站之間一處爛地。
搵到呢個地點，係因為去過幾次，影過幾次爛相先搵到。
呢個亦係攝影樂趣之一，同一地點，其實可以影好多次的，亦會失敗好多次！

另一個經驗分享就係，後製可以讓原來既照片更出彩。
呢次我利用LR既『D700 X5D2』SD風格檔，再加一重『漸變濾鏡』效果(主要係平衡光暗位既光差)，可以講，同當日所出照出，個效果根本就不可同日而語！

某年，深圳東站第一日開通，圖片係深圳東站第一班開出列車。。。
我地無官方背景，自不然難以混入，所以要花錢提前買車票，以『乘客身份』進入站台拍攝。
圖無乜技巧，純記錄。

D700+ S 2470/2.8。

廣州百年石圍塘廣車站前平交道口(可惜石圍塘火車站站房已廢，亦無再有客運服務。)。。
當日其實係我帶住老婆四圍逛下、散下心。。
經過當地剛好有火車經過，天氣又好，所以影低。
跟住就去左鐵路邊既茶居食飯。。。

D7100 + S18-35/1.8。

又係新火車站開通營業，不過，同行話新站無乜意思，於是又走去影柴油火車。。
就係咁，一個火車迷憨車車肆圍挪住部相機亂影一通既日子喇。。

D3s + S70200/2.8 OS。

鐵兄，雖然我對火車沒有興趣，但係我可以從你的相片同文字知道你對火車的熱愛。全部都是心機之作。

fisherman76 發表於 2015-6-12 01:11 AM
鐵兄，雖然我對火車沒有興趣，但係我可以從你的相片同文字知道你對火車的熱愛。全部都是心機之作。

多謝。。

心機唔代表有好作品的。。
有好多因素，量多肯嘗試係其一，其二係天氣，其三係時間。
相信呢幾樣野，你都會明白的。。

我末進化到去『畫意』既境界，宜家我係以『清楚影像細節』作為我表達作品既唯一標準。。

係香港，作為一個特殊愛好者，作為小眾，雖不犯法，但係作為鐵路迷，不被理解係理所當然既。。
最常被人問候既，一定係『有乜好影？』。。

另外要面對既就係香港較少既車型同拍攝場景。。
最近既應該係要返大陸。
但又面對一個嚴重問題——係香港唔係犯法，但回到國內雖然都無話『明文規定』係犯法，但係卻就慘過做賊！
朋友間經歷，被拉去公安局既有，被強行刪片既又有。。。
係香港習以為常既習慣，卻變成鼠竊狗偷既行為。。
奇就奇在，末有一人『被正式定罪』者，但遇到百般阻止卻又係鐵一般既事實！

此圖其實我係犯左『國安法』既，因為我身處地點，據講係『國家三級機密』(嚇？貨場咋喎？)，無錯，唔係我誇張，係鐵路公安親口証實既。
但係，通常而言，公安都係勸諭離開。
有時候同一地點，被認出了，上一次無事，呢次大家就客氣多啦。。
(講得唔好聽，就係要睇識唔識做人。)

有時候，攝影人經常會為一張靚相而『犯險』或做出出人意表之事，相信大家都有同感吧？
以下三圖，相信唔係一般人可以影到既角度來。
總之，保護自己安全第一，唔好麻煩人第二，第三係唔好傷害他人，之後我地先盡最大努力去獲取一張自己滿意既照片。
大家話係咪？

D3s + S70-200/2.8 OS。。

鐵路攝影，要面對既問題一籮籮，其中最大問題係時間同天氣。

鐵路攝影同航空攝影好相似——
1、要對班次(即火車經過時間)要有比較正確既掌握，而且要對機車型號要熟識操作時間。
2、要睇天氣做人但又唔可以下下都好天氣。
3、空閒時間末必有好天氣。但卻計劃不可改(尤其係需要長途拔涉果種。)。

我鐘意係唔理天氣，到現場喇，再睇環境睇下點影。
如前面幾圖，雖有陽光，但霧霾卻非常嚴重。
所以，有時就玩下光影算數啦。。

D3s + S50500 OS。

每處地方都有其『禁忌』，如上所講，內地鐵路貨場係唔好惹既。。。
尤其是係當有『軍事列車停靠』，一定唔可以舉機，如果唔係，分分鐘要食『蓮子羹』都話唔埋架。。
但聽過傳說，軍佬唔係刪你片，而係砸爛你部相機！

點都好，我個人堅持『與人為善』，唔可以分分鐘起角，係我化解每次危機既護身符來。。
講得唔好聽，我又唔係要殺人，只要大家意識到對方互相尊重，又有乜事係解決唔到既呢？
係咪？
(我以前講過有一次比公安追左我地五公里，最後係由我出面談判，結果最後我同公安拍膊頭吹水搞掂無事。)


影鐵路，其實都幾悶架。。
有時有感而發，偽朮一下啦。。
下圖係已經退役既中國鐵路『藍箭號』EMU，等待回爐等死者。
而第二圖則係港鐵既KTT。。。
點解要並列影一張？
又有乜意義？
只有熟知『九廣鐵路歷史』先至會感受得到——KTT係1997年服役，『藍箭號』EMU係1999年服役，10幾年後，KTT依然服務於九廣鐵路，但『藍箭號』卻已殘花敗柳，等待下葬！
再由此引伸出鐵路歷史同社會意義。。

唔識呢段歷史？
咪只不過係相片一張囉，有乜意思者？！

所以，有時候，睇唔明就睇唔明，又何必強求人地睇得明呢？
不如影一張讓人覺得悅目既相片唔係更加好乜？
都係取向者。。
我唔強求，大家又會唔會強求呢？

難得兩樣興趣可以夾埋一齊做，簡直係雙重享受啦！
多謝鐵兄再次分享作品及感受。

搞到有D興趣玩下鐵道攝

kinkwok 發表於 2015-6-12 08:59 AM
難得兩樣興趣可以夾埋一齊做，簡直係雙重享受啦！
多謝鐵兄再次分享作品及感受。

係架，迷鐵路既可以好瘋狂。。

我有一個鐵路迷朋友，佢已經單獨去日本影過晒板神地區既鐵路，又環遊大部份台灣，最誇張果次，係特鄧為左十幾公里既竹火車去左一次柬甫寨。。
佢手上只有一部D7000，一支18200就四圍去！
佢既圖片我就好欣賞的。
有時候，各人都有自己既『想法』，都會有自己既『局限』，懂得欣賞別人，其實睇別人作品就有不一樣既感覺。。

當然，又係果句，如果唔事前知道呢個人既背景，齋睇相其實可能又係一句『車，有乜咁叻？』。。
我只想回一句，你影到又影過先算啦。。

所以，縱或技朮有所不足，但係，我個人認為，每一張相都有其價值存在，也有其獨特性。。。
能唔能夠起到『共鳴』，其實更睇觀眾是否『站在同一個起點』去睇件事，係好有關系既。。

rockyiu 發表於 2015-6-12 11:27 AM
搞到有D興趣玩下鐵道攝

香港人來講，唔建議返大陸影喇。。

最好既係先去台灣練手，再去日本實習，保証有好好既作品出來。。
呢兩個地方有個共通點，就係對『鐵道攝影』群体唔抗拒，什至係會提供一定既方便。。

ironridder 發表於 2015-6-12 02:29 PM
香港人來講，唔建議返大陸影喇。。

最好既係先去台灣練手，再去日本實習，保証有好好既作品出來。。

很成功的一輯專題攝影 張張精品，尤其喜歡9#中 和諧號 的氛圍...欣賞

哈哈，比大家睇下我既作戰相先。。
除左影相，咁樣上山下海法，我自己會認為係一種体能訓練來。。

你個friend(第2張相黑衫)好似洪永城.

ironridder 發表於 2015-6-12 03:18 PM
哈哈，比大家睇下我既作戰相先。。
除左影相，咁樣上山下海法，我自己會認為係一種体能訓練來。。

影呢D預左係咁, 唔使托大炮俾公安追算係好好

fisherman76 發表於 2015-6-12 03:23 PM
你個friend(第2張相黑衫)好似洪永城.

的確！

當年第一次見洪永成上電視，我地成日挪呢位朋友開玩笑，話『發達啦，你又上左電視啦！』。。
佢唔單止樣似，連表情同小動作都好似。。
不過係唔同姓者。。