清邁蝶攝 (26樓加相)

rockyiu · 發表於 2016-5-21 00:48:03

本帖最後由 rockyiu 於 2016-5-24 10:56 PM 編輯

若然香港蝴蝶已經影得七七八八, 開始有點悶的時候, 大家可以試下出國影下蝴蝶, 叉下電, 可能又會重拾番影蝶樂趣.
四月去了一轉泰國清邁. 拜廉價航空hkexpress.com所賜, 有香港直飛清邁, 搶到平機票的話, 來回不用1000蚊(晚機去晚機返, 玩盡!).
清邁四日, 帶本passport就去得. 計番所有使費(食住行), 三千蚊左右. 白天影蝶, 夜晚見攰, 有骨揼(按腳都係三十蚊港紙一粒鐘), 有芒果糯米飯, 落pub, 三五知己, 價廉物美, 好好玩.

四日要影一百種蝴蝶, 相信不是難事, 周不時會見到好多香港沒有的蝴蝶.

推介地點, 首選清道. 三月開始一連數月, 都是蝴蝶旺季, 去到唔會無. 蝶導可以免了, 包車或自駕皆適宜, 初次去宜包車.

器材: Canon 5D3, Canon 180 macro lens, 600EXRT連柔光罩, 護膝護踭(必備)
機票: HKExpress
地點: 清道 / 雙龍寺, 附近National park, 最緊要找水源, 沿瀑布找更佳.
衣著: 因太熱, 多帶衣服更換. 乾爽長衫長褲, 戴帽.
洗費: 全部大概三千蚊左右
注意地方: 大量食水, 防蚊.

細灰難找嗎? 見到一隻會好興奮.

但如果一個細地方, 有過千隻細灰, 你可能會患上細灰恐惧症, 你會開始厭惡, 可唔可以唔好阻住我影蝶?

有無試過俾蝴蝶撞過? 來到清道, 可能會慢慢習慣, 你會嫌太多蝴蝶, 想影隻單頭都難.

我們需要細心從蝶群裡找到珍品, 因為稍一不留神, 就會錯過好野. 例如呢隻橙屎忽.

唔係香港果隻燕鳳. 佢滴緊尿

飲得多, 自然射得勁. 少少tips, 影屙尿, 唔一定需要一秒十張連拍, 佢通常會屙好多次, 屙完一次後, 默數五, 四, 三, 二, 一, 然後按快門, 應該就有機會捉到.

來到呢度, 會有太多趴地蝶, 護踭護膝係必需, 否則, 可能會損手爛腳. 同埋天氣太熱, 趴地慎防中暑, 一定要多飲水.

影趴地蝶, 盡量要焦平, 人要趴低, 相機能完全貼地為佳. 有直倒就最好拆左佢, 避免墊高左部機, 令到做唔到焦平. 咁背景就可能向地.

四星蝶種, 看似很罕有, 但去0岩地方, 去0岩季節, 要影到也不難.

呢隻蝶係目標蝶, 順利影到了.

有時為左就角度, 也不一定要焦平. 正遇上斜陽, 金光閃閃, 這個角度下, 感覺隻蝶從熊熊烈火中著草.

仲有一樣要提下, 呢度蝶多, 蚊也多, 而蜜蜂更多. 我已經被針好多次, 好痛, 又熱, 又缺水, 污糟蠟踏, 要影一張相唔係睇相咁簡單, 好辛苦的. 有時攰到索性攤屍咁攤0係地下, 任由蜜蜂針, 太陽曬.

好似呢類大種弄蝶, 有時會無時停. 切忌唔好追蝶, 等佢乖乖落地, 如果佢習慣左環境, 條尾點點地, 咁先好慢慢靠近, 影一張, 閃一下, 等佢適應左, 再慢慢得寸進尺, 步步進逼, 就算好埋身, 都唔怕嚇走隻蝶. 支鏡要好似打war game咁, 直線向前, 唔好睇playback, 亦唔好左搖右擺.