挪威遊兩圈

pngbb

上年一個人去咗斯洛文尼亞同克羅地亞3個星期，今年就同一對情侶朋友去挪威同瑞典。哈哈，我做咗廿幾日電燈膽。2019年頭已開始plan，決定去睇極光，所以就揀咗中秋節出發、重陽節返。秋天挪威天氣唔太穩定，但秋天係極光高峰期。而且風景又有另一種味道，所以就放棄一下藍天同綠油油嘅山。

呢次挪威之旅主要分南北兩圈，先行南圈再搭飛機北上，又行一圈。而挪威北面較窄，所以順便去瑞典留3日。

南圈︰HK Airport > Oslo Airport > Kristiansand > Stavanger > Bergen > Ålesund > Trondheim > Oslo
北圈︰Oslo Airport > Tromso Airport > Alta > Kiruna + Abisko (Sweden) > The Lofonten Islands > Tromsø

全程都係住民宿，而且係自駕遊，好正。挪威地大，鎮同鎮之間都要揸起碼4個鐘車。所以我個車牌雪咗十幾年，都要出發前補鐘，幫手揸車。基本上今次咩嘢路面情況都遇過︰夜晚全黑冇路燈、落雪、動物走出馬路、長到不得了嘅隧道…而因去到當地天氣萬變，甚至惡劣，好多想去嘅景點都去唔到。但事實上挪威同瑞典四維風景都好靚，一見到美景就停車到避車處去影下相。所以今次旅程都要作出好多取捨同妥協，隨機應變，呢次旅程確係人生好好嘅一次經驗。

第1站Kristiansand, Norway (14/9 – 15/9)
飛機降落挪威首都Oslo機場，先取車，就揸4個鐘車到Kristiansand休閒一晚先。坐完十幾個鐘飛機同揸咗4個鐘車，其本上都好累，又要到超市補給一下，都冇咩時間影相lu…

離開途中見到彩虹


第2站Stavanger, Norway (15/9 – 17/9)
原本想去Preikestolen (Pulpit Rock)，已預留一天時間去…不過全程落雨，又得3幾度。去到起點已經3點，挪威行山徑唔似香港鋪到靚靚咁俾人行，而且要爬過高兩米多大石。去到Pulpit Rock還有一百米，我朋友們已放棄，叫我自己行去。我自己行多幾十米後，那時已晚，而且大霧到好似個天跌咗落嚟咁。前路只見一條闊一米多嘅路，一邊係崖，一邊係山。能見度只有兩米，好似有一幅霧做嘅牆block咗條路咁。此時亦冇其他登山友，得自己一個人，基於安全還是要放棄… 好可惜，不過下次咪夏天再去過lor。

Hm… 都冇咩心情影相…

最好天時，都只見到一少藍天…


去到這裡已是第4天了，但部Z7還未換過電… 所以下了決心，重整心情，去到Bergen要影多D相~

pngbb

第3站Bergen, Norway (17/9 – 20/9)
Bergen係一個好靚嘅城鎮，附近都有好多出名嘅景點。我就住喺半山Fjellveien街，房間可看到Bergen市。好彩太陽伯伯都冇咁怕羞~ 不過都已經係7度，香港就算冬天都好少低過10度…

見到多D藍天


Seefahrerdenkmal, Bergen廣場位置






魚市場附近




車隊呢條路一直上有纜車上山頂，而中途半山落就可到我住那間民宿


Hanseviertel Bryggen係Bergen地標


當然唔少得撘纜車上山頂影日落

影日出


一班少朋友上山睇日出，好可愛~ 其實挪威好多街係冇咩街燈…所以有屋主都叫我哋夜出散步要穿反光衣


Vøringfossen，倒水




揸揸下車見到靚景，當然停停車影。不過要泊喺避車處或者休息點。

pngbb

第4站Ålesund, Norway (20/9 – 23/9)
Ålesund冇Bergen咁大，但都係一個好靚嘅城鎮，典雅小屋，附近亦有好多出名嘅景點。

由Bergen去Ålesund沿海風景都不錯，喺度等相中渡輪到岸。呢D渡輪服務係公路一部分，可運車， 去到碼頭排隊就可以。我哋一架SUV+3大人要HKD$200上下一程。船上有洗手間同有食物買。


第一日去到都好夜，都係第二日去Geiranger。若果係夏天，有郵輪會行入嚟。


呢個時候，D山頂都已經蓋上白雪。


落嚟呢度要走幾個髮夾彎，考下大家駕駛技術。


好快就又過多日，早上揸幾分鐘車上山頂影下Ålesund先


換支14-30mm f/4再影


影完Ålesund，就去到一個鎮叫Åndalsnes。先到Tourist Information Centre食個lunch先。


食完lunch就hike 兩個鐘左右上山，到Rampestreken。呢度有一個鐵台俾人行出去影Åndalsnes。呢張係我個friend幫我影，所以影得麻麻~


Åndalsnes呀


其實都好少時間喺Ålesund市內觀光，只係夜晚去食晚飯…




第5站Trondheim, Norway (23/9 – 24/9)
Trondheim只俾到兩日一晚時間，河邊小屋係出名景點。不過比丹麥Copenhagen, Nyhavn還差一級… 始終挪威最靚係山河自然景色




Nidaros Cathedral

pngbb

第6站Oslo, Norway (24/9 – 26/9)
揸7個鐘車返落Oslo，雖係挪威首都，不過都只可以安排到三日兩夜。天氣又不大好，算吧。南圈到這裡都已是尾聲，還是為北圈再入一點保暖衣服。經過機場先還車，因Oslo有電車，地鐵同巴士。One day pass都係HKD$90上下。

Oslo Opera House


爛得都幾好睇


Frogner Park & Monolitten︰一個大花園同大肉棒








Sagene Church


Damstredet，一條舊街




Trinity Church


Norwegian Parliament附近




Norwegian Parliament對面公園一Set主題公厠，NOK$5暢快一次。我就試咗，都幾過癮~


好了南圈已完，但回程時會再返Oslo。奕日一早搭9點機上Tromsø。

pngbb

第7站Alta, Norway (26/9 – 28/9)
下午1點出Tromsø機場，先取車，不留在Tromsø即去更北嘅城鎮Alta。去到已係夜晚，先去民宿同屋主say hi同安頓好就出去食晚飯。食完晚飯，又唔覺有極光，就早點回家休息。第二朝早就駕3個幾鐘車去North Cape。

今天日晚天氣不大好，不過沿路風景都好吸引，都係下車影影…


儲水湖前




終於到咗最北端North Cape，去到大約3度左右，風大過香港3號風球。整個天好似又跌咗落嚟咁，仲跌到落海。雖冇藍天碧海，但如此奇景，返更吸引。


天陰陰，但又有D怪光照到海面~








寒風刺骨，快D跳上車返Alta。而呢度我覺得最特別係有間Cathedral Of The Northern Lights。食完晚飯見天氣好轉，就碰碰運氣，試試喺呢間教堂前捕下，睇下影唔影到極光。影咗一個鐘都”見”唔到極光就失望地收腳架回民宿… 但最後返到香港，開RAW一睇，原來先發現上天對我不薄…

雖淡淡地，但第一張極光相就不知不覺地影了~


以為影唔到極光，黯然回到民宿… 正準備食水果時，突然收到宿主短訊話屋外有極光”跳舞”叫我哋快D去睇。我哋一開門踏出幾步，已經”嘩”咗出嚟。D極光好似被風吹動嘅窗簾咁，好靚好得意。呢間民宿喺一樓，門外有一個幾大嘅terrace，我哋就喺度影，相信亦冇時間另找地方影。






其實都算好彩，人生第一次入北極圈已經見到極光。

pngbb

第8站Kiruna, Sweden (28/9 – 30/9)
一早開車去瑞典，要揸6個鐘。由Alta南下入芬蘭嘅Hetta，喺度食lunch，入超級市場買下物資，之後再入瑞典。揸車過境係直行直過，過咗都唔覺，當然路牌同車嘅screen都有提示。去到都入夜，影下日落景先…




其實都係想去Abisko National Park行下同睇下影唔影到極光，所以就留喺Kiruna。不過呢幾日天氣差，常常落雪，走那天溫度跌到-3。冇極光睇，咁唯有圍住Abisko National Park個湖行一圈，都要3、4個鐘。

pngbb

第9站The Lofoten Island, Norway (30/9 – 4/10)
The Lofoten Island係挪威出晒名靚嘅地方，而且亦係影極光理想嘅地方。所以亦留得最耐，我哋留喺Reine…


最衰呢幾晚天氣麻麻，D極光都俾D雲摭住


呢度有幾靚？其本上揸車漫無目的，隨意去都遇到靚景。






















其實出發前都揾咗幾條行山路線，諗住去行下。不過去到都係放棄… 只有去一D十分易到嘅地方。好似呢個心心海灘Uttakleiv Beach~






我哋住喺Reine附近有坐山Reinebringen，最近當地鋪好1500級大石級上山頂。見只係上落石級，所以就決定上去。點知最高嗰30m係冇鋪石級，要爬上去… 上到去大風到8號風球咁，好似成日都有人推我咁。不過風景都係好靚，天氣好應該影得再靚D~


右邊先係山頂，不過太大風，我唔夠膽爬上去…


另外，仲去咗一條小漁村Nusfjord，都幾靚~ 沿途都充滿秋天氣息~






入到Nusfjord，食完lunch就四維影下相。








5日4夜就好快過咗…

pngbb

第10站Tromsø, Norway (4/10 – 7/10)
由Reine去Tromsø都要揸好耐車，而且沿途都好靚，不時下車影下相同休息下。




揸唔夠一陣車又影…




我哋學人砌咗個石塔仔


結果夜到成10點先到民宿… Tromsø排到最尾，其實好想喺呢度作最後衝刺，影多D極光相… 但可惜，呢幾日多雲有雨。所以都冇咩影相，轉一轉心情，去hea下，做下Gym，行下街食下嘢，嘆下coffee~

話雖如此，都影少少喇~ 搭纜車上Utsiktspunkt


Arctic Cathedral，個腳架波頭突然壞咗… 要手持拍攝




四維用GR3影下，Tromsø Cathedral


BIBLOTEK圖書館


喺條街Storgata影下相








呢個旅程，就隨著呢杯Kaffebønna AS嘅mocha喝完也一起完結了

charles2

比悿分比悿到手軟

TimmyL

pngbb

charles2 發表於 2019-11-24 10:36 PM
比悿分比悿到手軟

謝謝charles2師兄大大加咁多分

另跟時代進步，今次D相都用4K大小，望大家睇得清楚D。希望loading時間不會太長吧

pngbb

TimmyL 發表於 2019-11-25 12:41 AM

謝謝師兄觀賞

cbsphoto

正呀！

chiushing01

TimmyL

hiker

體會到幾辛苦,不過好好收穫.多謝分享.

tf1905

ccng

emdy

精彩的旅桯  多謝分享。

pngbb

早前貓貓病咗，好唔開心，亦忙於照顧。依家好返先有心情…  好多謝各位師兄觀賞同加分